– सरस्वती सरस
१,
लोभ, हिंसा, क्षोभ जसरी पनि हटाउनुपर्छ
आफूले आफैलाई कसरी हुन्छ मनाउनुपर्छ
निभ्न त एकदिन पक्कै निभ्छ यो जिन्दगी
मैन रहन्जेलसम्म जसरी पनि जगाउनुपर्छ
२,
भ्रष्टाचारी व्यक्तिको इज्जत नगर्नू
बेइमानी मानिसको सङ्गत नगर्नू
मागेर गुजारा चलाउने गरिबको
गाँस, बास र कपास जफत नगर्नू
३,
जानु छ एकदिन किन यहाँ ठुलो बन्नू
एउटै हो गन्तव्य खरानी जस्तै धुलो बन्नू
कतिका मन खेत,बारीझैँ बाँझिएका होलान्
सकिँदैन केही नसोच्नु सकिन्छ कुलो बन्नू
४,
नजिक भएकासँगै मन दु:खाइन्छ, टाढाका त टाढा भइहाले नि
प्रिय चिजलाई दिलमा लुकाइन्छ, टाढाका त टाढा भइहाले नि
माया गर्नेसॅंग समिप भइन्छ, घृणा गर्नेलाई बाइबाइ गरिन्छ
साँचो प्रेम गर्नेलाई प्रेम गरिन्छ, टाढाका त टाढा भइहाले नि
५,
समस्याले जीवन जिउँन सिकाउँछ
कुलतको नसाले पिउन सिकाउँछ
जीवन के छ र यहाँ मात्र दुइ दिनले
जन्म र मृत्युको बाटो सिउन सिकाउँछ
***
प्रतिक्रिया
-
४