✍️ अनमोल कंडेल

प्यारा
नानीहरू
तिमीहरूलाई
मैले नैतिकताको पाठ पढाउनु
मेरो गल्ती हुनेछ ।

त्यसैले,
म
बस
तिमीहरूलाई
एउटा कहानी सुनाउने छु ।

त्यो कहानी
जसमा
तिमीहरूलाई
तर्साउन सुनाइएका
भुतका कथाहरूमा
आउने
भूत
कोको
हुन ?
म
तिमीहरू सामु
खुलाउने छु ।

नानीहरू
तिमीहरू
त्यस्तो धरतीमा जन्मेका छौँ

जहाँ
पाखण्डको अघि
कहिल्यै ननिहुरिनु है

सुन्ने बित्तिकै
विश्वास नगर्नु है

बरु आफु को हो ?
आँफैलाई सोध्नु नि

आफैँले नभेटेसम्मै
उत्तर खोज्नु नि

भनेर सिकाउदा,
सुकरात भन्ने
मान्छेलाई
विष
खुवाएर
मारिएको
थियो ।

जस्ले आफु बाचुन्जेल
कहिल्यै
नडराउनु है
भनेर सिकाउने गर्थ्यो

जसले
सत्य
बोलेर हैन
बाचेर देखाउनु है
भनेर देखाउने गर्थ्यो

उस्लाई
तिम्रा पुर्खाहरूले
मारिदिएका थिए ।

हो
नानीहरू,
कहानीमा
सुनाइएको
एउटा
भूत
सुकरात
भन्ने मान्छेको हो ।

अनि
तिम्रा पुर्खाहरूले
त्यस्ता
थुप्रै
सुकरातहरूलाई
मनसुरहरूलाई
अनि
ग्यालिलियोहरूलाई
भुत बनाइदिएका छन्।

ताकि –
हुर्किदै गर्दा
तिमीहरूको
मनमा
डरको बिउ उम्रियोस
र हुर्किसकेपछि
त्यो डरको रुखमा
पाखण्डको फल लागोस् ।

त्यसैले
म तिमीहरूलाई
झुठलाई झुठ भन्नु भनेर भन्दिन ।
पाखण्डहरूको विरोध गर्नु भनेर सिकाउदिन ।

किनकि
तिमीहरू
सुकरात बन्न खोज्यौ भने
उनीहरूले तिमीहरूलाई
खोजी खोजी
कारागारमा हाल्नेछन् ।

नानीहरू
तिमीहरू
त्यस्तो संसारमा
जन्मेका छौँ

जहाँ
बाहिर देखिदा
असल देखिएका कुराहरू
वास्तवमा
असल देखिएका मात्र हुन्

त्यसैले
म तिमीहरूलाई
नैतिकताको पाठ पढाउने छैन

बरु एउटा
जादुयी
एेना
दिनेछु

जहाँ तिमीहरुले
स्पस्ट
देख्नेछौ कि

हामीहरू
छल गर्नेहरू
र
अरुलाई मारेर बाच्नेहरूको
सन्तान हौ ।

र
हामीहरूलाई
डराउन
बोलाइने
भुतहरू

हाम्रा
पुर्खाका
हातबाट
मारिएका
सुकरातहरू हुन् ।