– राधिका कल्पित

प्रिय छोरा !
म जन्मदै
तिम्रो लागि एउटा `घर´ लिएर आएकी थिएँ ।

तिम्रो खुत्रुके जत्रो मेरो पाठेघरमा
नौ महिना बसेपछि
तिमी जन्मियौ ।

तिमी जन्मिएपछि
तिम्रा पिताले सकिनसकि तिम्रा लागि एउटा घर बनाइदिए ।

तिमी बढ्दै गयौ
बाउको घर पनि साँघुरो ठान्यौ
फेरि अर्को आलिसान घर बनायौ ।

हिजो मेरो पाठेघरबाट तिमी निस्किएपछि
म `आमा´ बनेकी थिएँ ।

छोरा
आज तिम्रो महलबाट म निस्किएपछि
तिमी `छोरो´ बन्यौ कि बनेनौँ ?
***