✍️ माया एन्जेलो

अनुवाद : रिमा केसी

सुन्दर महिलाहरू मेरो सुन्दरताको रहस्य कहाँ छ भनेर अचम्मित हुन्छ्न्
म चिटिक्क छैन वा
कुनै फेसन सुन्दरीको आकारमा टमक्क मिल्ने गरी बनेकी छैन म
तर जब म उनीहरूलाई भन्न थाल्छु,
म झुठ बोल्दैछु सोच्छन, उनीहरू
म भन्ने गर्छु,
यो मेरो पाखुराको पहुँचमा छ,
मेरो नितम्बको फैलावटमा छ
मेरो पाइलाको लम्काईमा छ
मेरो अधरको चालमा छ
म एक महिला हुँ
असाधारण रुपमा
विशिष्ट नारी,
म नै हुँ !

तिमीले सोंचे जत्तिकै शालीनतामा
म कोठाभित्र छिर्छु
पुरुषहरु भएको ठाउँमा पुग्छु
तिनीहरु सतर्क हुन्छ्न्
आदरसाथ निहुरिन्छ्न घुँडामा
मौरिहरुले रानो घेरे झैँ
मेरो वरिपरि भुन्भुनाई रहन्छन् तिनीहरु
म भन्ने गर्छु
यो मेरो आँखाको ज्वालामा छ
मेरा दाँतको चमकमा छ
मेरो कम्मरको लचकतामा छ
र मेरा पैतालाको रोमान्चकतामा छ
म एक महिला हुँ
असाधारण रुपमा
विशिष्ट नारी,
म नै हुँ !

पुरुषहरू आफैँ आश्चर्यमा पर्छन्
जे देख्छन् म मा उनीहरू
निकै प्रयास गर्छन्
तर छुन भने सक्दैनन् तिनीहरू
मेरो भित्री रहस्यलाई
जब मैले देखाउन खोज्छु,
देख्नै सकेनौँ भन्छ्न तिनीहरू
तब म भन्ने गर्छु
यो मेरो पिठ्युँको सुगठनमा छ
मेरो मुस्कानको प्रतापमा छ
मेरो वक्षको उचाईमा छ
मेरो स्वभावको शालीनतामा छ
म एक महिला हुँ
असाधारण रूपमा
विशिष्ट नारी,
म नै हुँ !

अब तिमीले बुझ्यौ
किन मेरो शिर यसै झुक्दैन
म चिच्याउँदिन, उफ्ररिएर हिँड्दिन
न त कुरा गर्छु ठूलो आवाजमा
जब तिमी मलाई जाँदै गरेको देख्छौ,
तिमीलाई गर्व महसुस हुनु पर्छ
म भन्ने गर्छु
यो मेरो पैतालाको चालमा छ
मेरो केशरासीको घुम्राइमा छ
मेरो हातको हत्केलामा छ
मेरो शुश्रुसाको आवश्यकतामा छ
किन कि म नारी हुँ
असाधारण रूपमा
विशिष्ट नारी,
म नै हुँ !!