– डिएनके कुवँर

गजल १,
शाखा अधिकृत नासु खरिदार के पढ्नुहुन्छ ?
बिज्ञापन खुलेको छ शहर बजार के पढ्नुहुन्छ ?

योग्यता अनुसारको रोजगार छैन हाम्रो देशमा
जानु नै छ आखिर दुबई कतार के पढ्नुहुन्छ ?!

अस्पताल पुग्न नसकेर भाउजुको ज्यानगयो
ए साँईलादाई रेल आउने समाचार के पढ्नुहुन्छ ?

कर्म गर सफल हुन्छस भन्नुहुन्छ हजुर-आमा
कम्मर कँस्छु सफल हुन्छु निधार के पढ्नुहुन्छ ?

के-को तयारी छ ? कोठाबाट बाहिर निस्कनुहुन्न
एकदिन त आराम गर्नुस् शनिबार के पढ्नुहुन्छ ?

गजल २,
अब के के कुरा हुन्छ भनिदिनुहोला
मेरा दुई कानले सुन्छ भनिदिनुहोला

उ त पागल छ यार भट्टिमा जान्छ
गिलास ठोक्छ रुन्छ भनिदिनुहोला

घर छोडेर डेरा बस्न शहर गएपछि
माकुरोले जालो बुन्छ भनिदिनुहोला

विद्या र धनलाई एकठाउँमा राख्दा
कस्ले कस्लाई चुन्छ भनिदिनुहोला

कसैप्रति दिल गएको छ मेरोपनि
आज धर्तीमा जुन्छ भनिदिनुहोला

***