रामेछाप‍- न कुनै खोला, ताल तलाउ, न कुनै कुवा पानीको मुहान । वर्षौँदेखि खानेपानीकै लागि काकाकुल बनिरहेको जिल्लाको खाँडादेवी गाउँपालिका ६, माकादुम खत्रीगाउँमा अब भने पानीको समस्या साम्य भएको छ । खडेरीका कारण खानेपानीको श्रोतमा पानी सुकेर बर्षौदेखि खानेपानीको सास्ती खेप्दै आएका बासिन्दाले मङ्गलवार टोलमा खानेपानी झरेपछि खुसीयाली मनाएका छन् ।

वडा अध्यक्ष नारायण कार्कीको सक्रियतामा खत्रीगाउँको टोल टोलामा पानी झरेको खुसीयालीमा उनीहरुले घरघरबाट दहिको ठेकीनै बोकेर पानीका लागि खट्नेहरुलाई सगुन खुवाएका छन् । यसअघि एक गाग्री पानीका लागि पौनेघण्टा तलको पधेरामा पुग्न स्थानीय बाध्य थिए । अब सास्ती हटेको भन्दै स्थानीयले दिनभर जस्तो खुसीयाली मनाए ।

बर्षौअघि पानीको श्रोत भएको खत्रीगाउँमा जमिनभन्दा १ सय ८० मिटर तलको पानी बोरिङ गरेर निकालेर ७ सय ५० मिटरमाथि डाँडामा लगिएको छ । वडा अध्यक्ष कार्की भन्छन् – प्रति सेकेण्ड ४ लिटरको दरले माथि डाडाँमा झरेको पानीलाई हाल अस्थायी रुपमा टोल टोलमा वितरण गरिएको छ । ‘मङ्गलबारदेखि गाउँलेले खानेपानी खान थाले’ कार्कीले भने ।

साविकमा तामाकोसी सेवा समितिले निर्माण गरेका साना ट्याङ्की र गत बर्ष प्रदेश सरकारको लगानीमा निर्माण भएको ट्याङ्कीमा जमाएर खानेपानी वितरण गर्ने मेलो मिलाइएको छ । अब केही अवधिमा घर पाएक पानी वितरण गर्ने गरी पाइपको व्यवस्थापन गर्न लागिएको कार्कीले बताए । उनले पाइप खरिदका लागि बोलपत्र आह्वान भइसकेकोले चाडै पाइप माकादुम आउने पनि बताए ।

‘बोरिङ गर्न लाग्दा धेरैले पानी आउँदैन भनेका थिए’ कार्कीले भने – तर राम्रो पानी आयो, अब झन्डै ३ सय परिवारलाई यही पानी वितरण गर्ने योजना छ । माकादुममा झन्डै ७ सय परिवार बसोबास गर्ने तथ्याङ्क छ । तर झन्डै २ सय परिवार नियमित रुपमा माकादुम बस्न छोडेर काठमाडौँ तिर बसोबास गर्नेछन् । ५ सय परिवार मध्ये झन्डै २ सय परिवारले हाल अन्य श्रोतको खानेपानी प्रयोग गर्दै आएका छन् ।

हामी ३ सय परिवारलाई पानी वितरण गर्नेतर्फ आवश्यक पहल गरीरहेका छौँ वडा अध्यक्ष कार्की भन्छन् – घरमा पानी पुर्याउने र त्यसलाई जम्मा गर्न वडालेनै ट्याङ्की समेत वितरण गर्नेछौँ । वडा कार्यालयको बजेटबाट यस बर्ष ५ सय लिटर पानी अटाउने ५ सय वटा प्लाष्टिकका ट्याङ्की खरिद गरेर स्थानीयको घर घरमा पुर्याउने लक्ष्य राखिएको छ ।

***