✍️ विपिन सलामी

गजल – १
घर भएर मात्रै पनि घर नहुने रहेछ
सबै अग्लो डाँडो गौरीशंकर नहुने रहेछ

कसैले हसियाँ उध्याएको त्यो ढुङ्गो हुँ
ढुङ्गा हुँदा त आफ्नै खबर नहुने रहेछ

जति घुमाए पनि त्यो जादुगरले छडी
गाउँघरको समस्या छुमन्तर नहुने रहेछ

यशोदा माईको हातको डोरीजस्तो जिन्दगी
कृष्णको लीलाजस्तो सुन्दर नहुने रहेछ

ऊ तलाउँ हुँ भन्छ, ढुङ्गा हानौँ साथीहरू
असर हुने रहेछ कि असर नहुने रहेछ

गजल – २

बर्षौ अघि हो मौसम बदलिएको त
किन फेरि यो बर्षात नरोकिएको त ?

म यो गल्तीको पुरानो दरबार हुँ
सेल्फी खिचेपछि हुँ चिनिएको त

लाज पोखिँदैछ बजारमा खुलेआम
स्तन मात्रै त रहेछ छोपिएको त

कि यो गङ्गा कसका लागि बगरिहन्छ
अक्सर यही प्रश्न हो सोधिएको त

कमसेकम तिम्रा ओठमा हाँसो ल्याएँ
तिम्रो काम लागेछ म रोइदिएको त

म खाम सुराकीको राजजस्तो थिएँ
उसको घरमा पुगेर हुँ खोलिएको त

तेरो ‘सलामी’ सुगन्ध बरकरार नै छ
जमाना बितिसक्यो तँ चुँडिएको त