✍️ दिपक राज
मुक्तक – १
कोही सिक्दै छन् केही धेरै जान्नेहरु छन्
कोही भने आफैंलाई महान् ठान्नेहरु छन्
दुस्खी नहुनुहोस् हजुरको खुट्टा ताने भनी
खुट्टा तान्नेहरूका पनि खुट्टा तान्नेहरू छन् ।
मुक्तक – २
भोली साथ कसले दिन्छ थाहा हुँदैन
विपक्षमा को उभिन्छ थाहा हुँदैन
बाचुन्जेल कसैलाई दुखाउन नपरोस्
जिन्दगानी कहाँ टुङ्गिन्छ थाहा हुँदैन ।
मुक्तक – ३
सोच्दछु के पो गर्दै होली निद्रा लाग्दैन
खाए पनि निदकै गोली निद्रा लाग्दैन
यो मायाँ प्रेममा यस्तो सम्म हुने रहेछ !
नसुनेसम्म उसको बोली निद्रा लाग्दैन ।
मुक्तक – ४
मुठी होइन मानो होइन पाथी सोचेको थें
सम्बन्ध छ हाम्रो निकै माथी सोचेको थें
आँखा बन्द गर भनी छुरा रोपी गयौँ
मैले तिमीलाई असल साथी सोचेको थें
मुक्तक – ५
खुसी हुनु सुखी हुनु मलाई नसम्झनू
कहिल्यै पनि नरुनु मलाई नसम्झनू
धन सम्पत्ति र अवसरले अलग गरायो
सफलताले शिखर छुनु मलाई नसम्झनू
प्रतिक्रिया
-
४