– नवराज न्याैपाने ‘माैन’
गजल १
जाँचेर आफ्नु साथी छान्ने रहेछ माया
हाँसेर ज्यून एक्लै जान्ने रहेछ माया
पोखेर भाव नौलो साथी बनाइ यौटा
सर्वस्व जिन्दगानी ठान्ने रहेछ माया
संसारमा रमाई खोजेर काम नौलो
पाङ्ग्रा दुई रथैको तान्ने रहेछ माया
देखेर देश सारा फर्केर आज गाउँ
संस्कार-पर्व-इज्जत धान्ने रहेछ माया
संघर्षले कमाई विश्वासले हिंडाई
सन्तानको चिनारी मान्ने रहेछ माया
गजल २,
सल्किन्छ भित्रभित्रै, आगो रहेछ माया,
जेलिन्छ जिन्दगानी , धागो रहेछ माया
टिप्दै गएर भाषा , खिप्ने रहेछ गाथा,
निर्बन्ध भावनाको, छाँगो रहेछ माया।
बुन्दै अनन्त माया, सुन्दैछ गीत नौलो,
हज्जार पुष्प फुल्ने, हाँगो रहेछ माया।
बाँधेर एकताले, नाघेर साँध जम्मै,
धोएर वस्त्र राख्ने, टाँगो रहेछ माया।
उम्रन्छ आश नौलो, हुर्कन्छ प्रेमधारा,
धर्ती समान माटो , पाँगो रहेछ माया।
प्रतिक्रिया
-
४