मिलन समीर नेपाली कवितामा एक चिपरिचित नाम हो । ” मिर्मिरे बिहानी ” शीर्षकको कविता मार्फत साहित्यमा प्रवेश गरेका उनकोमिलन समीर र मिलन समीरहरु शृङ्खला कविता  सङ्ग्रह सार्वजनिक भएको छ। यसै सङ्ग्रहको सरोफेरोमा रहेर सम्पादक जीवनखत्रीले सोधेका पाँच प्रश्न र जवाफ :

१) नयाँ कविता सङ्ग्रहको नाम ” मिलन समीर र मिलन समीरहरू ” राख्नुभएको छ । किताबको नाम नभेटिएको हो कि अल्छि गर्नुभएको हो ? वा कविलाई आफ्नै नाम प्रिय लागेको हो ?– यो कविता कृतिको नाम ” मिलन समीर र मिलन समीरहरु ” नै राखिनुपर्छ । किन राखिनुपर्छ ? भन्ने प्रश्नको चित्तबुझ्दो जवाफ यो कविता कृतिभित्र समावेश गरिएका कविताहरुले नै दिनेछन् भन्ने कुरामा म ढुक्क रहेको छु । त्यसैले नयाँ कविता सङ्ग्रहको नाम ” मिलन समीर र मिलन समीरहरु ” नै किन राखिएको हो त ? भन्ने प्रश्नको चित्तबुझ्दो जवाफको लागि यो कविता कृतिभित्र प्रवेश गर्नैपर्छ ।

२, यस कृतिमा के कस्ता किसिमका कविताहरू समावेश गरिएका छन् ? कविताहरूको भीडमा यस कृतिका कवितामा के फरकपन ह‍ोला ?
– यो शृङ्खला कविताहरुको किताब हो । यस कृतिमा दुई दशकको समयावधिभित्र लेखिएका ” मिलन समीर र मिलन समीरहरु ” शीर्षखण्ड अन्तर्गत १८ वटा शृङ्खला कविताहरु, ” पर्खाइमा ” शीर्षक अन्तर्गत ४ वटा शृङ्खला कविताहरु, ” यतिबेला ” शीर्षक अन्तर्गत ३२ वटा शृङ्खला कविताहरु, ” दृष्टिभ्रम ” शीर्षक अन्तर्गत २ वटा शृङ्खला कविताहरु, ” दुर्भाग्य ” शीर्षक अन्तर्गत ५ वटा शृङ्खला कविताहरु, ” विडम्बना ” शीर्षक अन्तर्गत १० वटा शृङ्खला कविताहरु र ” केही अपवादबाहेक ” शीर्षक अन्तर्गत ५ वटा शृङ्खला कविताहरु गरि जम्मा ७६ वटा समसामयिक युगीन विषयसन्दर्भ र प्रसङ्गहरुमाथि केन्द्रित रहेर लेखिएका अर्थपूर्ण कविताहरु समावेश गरिएका छन् ।
कविताहरुको भीडमा यस कृतिका कविताहरुमा निश्चितरूपमा केही न केही फरकपन छ नै । साच्चिकै के कस्तो किसिमको फरकपन रहेको छ भन्ने कुरा थाहा पाउनका लागि पनि त यो किताब पढ्नैपर्ने हुन्छ नि ।

३, गजल लेखनमा अब्बल भनेर चिनिएको मिलन समीर कविता सङ्ग्रह लिएर आउनुको कारण के होला ? कवितामा भन्न खोजेको कुरा गजलमा भन्न सकिएन ?

– सबैभन्दा पहिले त मेरो गजल सङ्ग्रह पनि प्रकाशनको तयारीमा रहेको छ भन्ने जानकारी गराउछु ।
कविता सङ्ग्रह नै लिएर आउनुको पहिलो कारण त मेरालागि कविता विधा सबैभन्दा प्रिय विधा हुनु हो । दोस्रो कारण म आफू कविता लेखनको सन्दर्भमा एकहदसम्म सन्तुष्ट हुनु हो भने तेस्रो कारण कवि व्यक्तित्वको फराकिलो पाटोको रूपमा मिलन समीरले आफ्नो सुनिश्चित स्थानको खोजी गर्नु पनि हो ।
निश्चितरूपमा कवितामा भन्न खोजिएका कुराहरुलाई गजलको माध्यमबाट मात्रै भन्न अलिक असहज नै हुने रहेछ ।

४, यस सङ्ग्रहभित्रको कुनै एक कविता लेखनको पृष्ठभूमि भन्न मिल्छ भने बताईदिनु न ! जसकारण त्य‍ो कविता लेख्न रहर/कर लाग्यो ।
– यस सङ्ग्रहभित्र समेटिएका ७६ वटा कविताहरु लेखनको केही अपवादबाहेक प्रायः सबैको अलगअलग पृष्ठभूमि रहेको छ । सोही अनुसारको अलगअलग पृष्ठभूमि भएकै कारण यी कविताहरु मध्ये कतिपय कविताहरु लेखौ लेखौको रहर लागेर त कतिपय कविताहरु लेख्नैपर्ने कर लागेर लेखिएका छन् । कुनै पनि कविता लेखनको पृष्ठभूमिको बारेमा पहिले नै खुलस्त रूपमा उल्लेख गरिदिने हो भनेदेखि फेरि उक्त कविता पढ्नुको मज्जा बाकी नरहला कि … ?

५, पाठकले तपाईँको कविता कृति किन पढ्ने ? पढ्ने पाठकले तिरेको मूल्य असुली होला ?
– एउटा युवाकविको रूपमा मिलन समीरले कविताको नाममा के लेखिरहेको छ ? कविता विधाको मुलमर्मलाई आत्मसात गर्दै आफ्नो अलग पहिचान कायम गर्नसक्ने किसिमका स्तरीय कविताहरु लेखेर कविता लेखनको सन्दर्भमा वैकल्पिक बाटो बनाउदै सोही बाटोमा पृथक पाइलाहरु चालिरहेको छ कि … ? अरु कसैले बनाइदिएको मुलबाटोमै अरु कसैका पाइलाहरु पछ्याउँदै लुखुरलुखुर हिंडिरहेको छ … ? भन्ने कुरा बुझ्नका लागि पाठकहरुले मेरो कविता कृति पढ्नुपर्छ । अलिक फरक किसिमका अर्थपूर्ण कविताहरुको अर्गानिक स्वाद लिनकै लागि पनि ” मिलन समीर र मिलन समीरहरु ” शृङ्खला कविता कृति पढ्नैपर्छ ।
पढ्ने पाठकद्वारा तिरिएको मूल्य मज्जाले असुली हुन्छ । यो कुरामा ढुक्क भएरै ” मिलन समीर र मिलन समीरहरु ” शृङ्खला कविता कृति किनेर पढ्न सकिन्छ ।
***