✍️ बलदेव केसी भरिया

सुन्दर सुदुर पश्चिम
सुन्दर अछाम
सुन्दर साँफे

देवताको रङ्ग पोत्तिएका चुचुरा
जीवनको सुगन्ध लुकेको माटो
हरेक प्राणीको जीवन बोकेर
उभिरहेका हरिया पहाडहरू
र त सुन्दर सुदुर पश्चिम
सुन्दर अछाम
सुन्दर मंगलसेन

पहाडहरू
अनादि कालदेखि
निलो आकाश बोकेर
ठिङ्ग उभिएको छ
सेता बादलहरुको फेटा कसेर

क्या सुन्दर सुदुर पश्चिम
सुन्दर अछाम
सुन्दर रमारोशन

दुई पैताला अट्ने गोरेटो
चार पाईला अट्ने घोडेटो
चार पाङ्रा अट्ने फराकिलो सडक

त्यसैले त सुन्दर सुदुर पश्चिम
सुन्दर अछाम
सुन्दर चौखुटे

जीवन दिएर
जीवन दिनको लागि
यही बाटो भएर
बगिरहेको छ
कैलाश खोला, बुढीगंगा
अनि त सुन्दर सुदुर पश्चिम
सुन्दर अछाम
सुन्दर मलेख

गुराँस जस्तै फुलेको जीवन
ऐँसेलुजस्तै पाकेको विचार
थरिथरिका देवताको वासस्थान
जतततै स्वर्ग
सुन्दर सुदुर पश्चिम
सुन्दर अछाम