✍️ विमला विकिरण

गजल – एक

भत्किए नि बिग्रिए नि बाटो जिन्दगीमा
तिमी बाहेक को छ र ? अर्को जिन्दगीमा

आफैँलाई म को हुँ थाहा छैन अझैसम्म
तिमी सोध्छौ म को हुँ ? तिम्रो जिन्दगीमा

इन्द्रेणीका रङ पनि फिक्का भईदिन्छन्
विधुवाको शरीर जस्तै सेतो जिन्दगीमा

म छु र पो, तिमी छौँ, दुनियाँ छ,सृष्टि छ,
अरु के छ ? आफूभन्दा ठूलो जिन्दगीमा

गजल – दुई

रोपिए झै दिलमै छुरा रोईरहेछन्
सम्झेर पुराना कुरा रोईरहेछन्

देश दुख्दा राजधानी रमाईरहन्छ,
दुखेछन् बझाङ बाजुरा रोईरहेछन्

रहर नमेटिदै रङ्ग खोसियो उनको
सिन्दुर पोते रातो चुरा रोईरहेछन्

कस्ले भनिदिए छ आमा ईश्वर हुन्
आज सडकमा टुहुरा रोईरहेछन्