✍️ वैद्यनाथ श्रमजीवी

मुक्तक – १

धार्मिक चाडपर्व आउँछ पालैपालो
तिहारमा धुवाँको प्रदुषणले कालो
अधिकार बिहिन छन् झुपडीहरू
महल हुनसक्छ शोषणले उज्यालो !!

मुक्तक – २
महलमा दिनहुँ तिहार आएको हुन्छ
झुपडीमा बेरोजगारी छाएको हुन्छ
किसान मजदुरको पसिना लुटेर
शोषकले खुसीको गीत गाएको हुन्छ ११

मुक्तक – ३

दरबारमा पर्वले खुसीयाली आउँछ
झुपडीमा सँधैं ऋणको त्रास छाउँछ
लक्ष्मीको आशमा दिपावली गरे पनि
तिर्न नसक्दा साहुले उठीबास गराउँछ !!

मुक्तक – ४

मान्छेको भेला गरिन् लक्ष्मीले
पैसाको खेला गरिन् लक्ष्मीले
भ्रष्टाचारीहरूको दासी बनेर
गरिबलाई हेला गरिन् लक्ष्मीले !!

मुक्तक – ५

महल भित्र गरिन्छ दिनहुँ अनेकौं श्रृंगार
पैसा भए खल्तीमा घरमै धाउँछ बजार
अन्धकारमा हुन्छ गरिबहरूको झुपडी
बेरोजगारले कसरी मनाउने हो तिहार !!