✍️ सरिता तुलाधर

 मुक्तक – १

किन सताउछौ ? बेला बेला सम्झना पठाएर
के पायौं ? तिमीले त्यो मन बाट मलाई हटाएर
म त तिम्रो लागि सबैभन्दा माथि थिए होइन र ?
सम्झन्छु मेरो लागि हिडेको थियौ जिन्दगी खटाएर ।

       मुक्तक – २

मन पराउने यो आँखाको बयान म आफैँ गर्छु
उसलाई दु:ख नहोस् भनेर काम गर्न म अघि सर्छु
उसले के चाहन्छ त्यै बन्न तयार छु म सधैंको लागि
भगवानले माथि लगे पनि उसको लागि झर्छु ।

   मुक्तक – ३

फूलको जीवन मन परेन सबैले मार्छन्
फलको पनि मन परेन त्यो पनि झार्छन्
के को जीवन जिउ भनि सोच्दैछु अचेल
मान्छेको त झन मान्छेले नै खत्तम पार्छन् ।

मुक्तक – ४

बाहिरी आवरणले थाह हुन्न भित्रको कुरा
हिजोआज जे पनि ठिक लाग्छ मित्रको कुरा
सत्य, तथ्य प्रमाण निकाल्न आफै लाग्नुपर्छ
अचेलका मान्छेलाई पच्दैन पबित्रको कुरा ।

  मुक्तक – ५

केही दिनको भेटमा कोही देवता , कोही ढुङ्गा भैदियो
उसलाई माया गर्दागर्दै मेरो मन नचलेको डुङ्गा भैदियो
मायाप्रेमले दिएको औषधि पनि काम लागेन आज
हामी दुईको माया ओइलेको फूलको थुङ्गा भैदियो ।