– पवन लामिछाने

गजल १,
तिम्रो यादको तलतल जहाज चढेर आउँछ
यो मुटुको दमकल जहाज चढेर आउँछ

झर्दैनन् कोहि झर्दैनन् आफ्नै आँसु बोकी
अचेल लाग्दैछ बादल जहाज चढेर आउँछ

एउटा म भइ हालेँ, एउटा हजुर हुनुहुन्छ
विदेशमा अर्को पागल जहाज चढेर आउँछ

गरिबले जमिन छोड्न पनि मृत्यु पर्खनुपर्छ
धनीले पिउने बोत्तल जहाज चढेर आउँछ

तमसुकमा यत्ति लेखेर ऊ शहर छिरेको हो
फर्कदा यही चप्पल जहाज चढेर आउँछ

गजल २,
मनभित्रको हुरी कसले देखेको छ ?
जिब्रोको खुकुरी कसले देखेको छ ?

हामीसँगै हाँसेको दुनियाँले देख्यो
सम्बन्धको दूरि कसले देखेको छ ?

कसरी बग्यो होला यादहरुको नदी
आँखाको मजबुरी कसले देखेको छ ?

लगाएको आरोप कागजले बोल्यो
भएको मन्जुरी कसले देखेको छ ?

उल्लासको मेलामा हरायो मनुष्य
पीडाको माधुरी कसले देखेको छ ?

***