– एस पि माथवर ‘पूर्ण’
गजल १,
यता रित्तै उता तिर खानी खानी दिए हुन्छ ।
पीडा जति मेरै भाग जानी जानी दिए हुन्छ ।।
एउटै धर्ती ओच्छ्याउला आकाश ओढौला।
भन्थ्यौ तिम्रो त्यो हातको सिरानी दिए हुन्छ।।
स्वर्ग जाने बाटो मलाई थाहा छ प्रियसि।
मर्ने बेला तिम्रो हातले पानी दिए हुन्छ ।
दैव ,रोजे जस्तै घर सोचे जस्तै वर दिनु।
अझ जीवनसाथी भाग्यमानी दिए हुन्छ ।।
माथवरलाई के छ र बाचिदिन्छ यसैनि।।
मात्र याद आउने फिर्ता निशानी दिए हुन्छ ।।
गजल २,
घरमा आमा बिरामी ,बाबालाई दम भएको छ ।
डाक्टर भन्छ, बाच्ने सम्भावना कम भएको छ ।।
परदेशमा मलाई नखाएको बिष लाग्यो आमा।
पीर चिन्ताले यतैतिर, मरम मरम भएको छ ।।
रिन लागेको बेलामा दिन लाग्यो जिन्दगीमा ।
पीडा र आशुको एकैचोटी संगम भएको छ ।।
सुख दुःखको साथी भनेको उहीँ त रहेछ यार ।
आजभोलि मलाई त मदिरा मलम भएको छ ।।
- तोड्न ,खान र पचाउन पनि सजिलो भएर होला ।
हेर्नुस् है विश्वासको अर्को नाम कसम भएको छ ।।
प्रतिक्रिया
-
४