✍️ दीप मिलन
गजल – एक
बेला हरायो बाटो लिएर
जाऊँ कहाँ मन रित्तो लिएर
चासो र चिन्ता बढ्दोछ हरपल,
बस्दैछ दुनियाँ पासो लिएर
विज्ञप्ति आयो बन्दुकहरूको
आए परेवा आगो लिएर
चिम्लेर आँखा हेर्दै थिएँ म,
आयो जमाना कात्रो लिएर
मनको महल यो छाउँछु म मनले,
जाओ हुरी हो छानो लिएर
गजल – दुई
निशाचर बासमा जाऊ बिहानी भैसकेको छ
उज्यालो रातका लागि सिरानी भैसकेको छ
कहाँ रोकिन्छ पैताला सडकमा आगो देख्दैमा,
धुवाँको मार्ग टेकी हिँड्ने बानी भैसकेको छ
तिमी गाजल लगाएर नजरको तीर मार्दैछौ,
कसैको मन यसैले बेइमानी भैसकेको छ
गरूँ स्वागत म काँडाको हृदय मखमल बनाएर,
कुसुम जस्तो स्वयं यो जिन्दगानी भैसकेको छ
निभाऊँ दीपलाई भन्ने इच्छा त्याग आँधीले,
ममाथि तेलको जीवन लगानी भैसकेको छ
प्रतिक्रिया
-
४