रामेछाप– जिल्लाको प्रसिद्ध एवम् ऐतिहासिक धार्मिक तथा पर्यटकीय स्थल खाँडादेवी विकास कोषको१२ औं साधारणसभा तथा तेस्रो अधिवेशन सप्पन्न भएको छ । अधिवेशन बाट अध्यक्षमा पुनः शेरबहादुर तामाङ सर्वसम्मत निर्वाचित भएका छन् । शुक्रवार भएको १२ औँ साधारणसभा तथा तेस्रो अधिवेशनले तमाङलाई पुनः निर्विरोध निर्वाचित गराएको हो ।

तामाङको अध्यक्षतामा १३ सदस्यीय कार्यसमिति पनि निर्विरोध चयन भएको छ । कार्यसमितिको उपाध्यक्षमा चुनबहादुर खत्री, सचिव कमल केसी, सहसचिव बालकुमारी खड्का र कोषाध्यक्षमा प्रकाश बुढाथोकी रहेका छन् । तेस्तै सदस्यहरूमा तेजराज घिसिङ, भक्तिमाय श्रेष्ठ, क्षेत्रबहादुर बुढाथोकी, मनोज बुढाथोकी, मिना तामाङ र बसन्ती तामाङ चयन भएका हुन् ।

खाँडादेवी विकास कोषको उद्घाटन सङ्घीय संसदका सभामुख देवराज घिमिरेले गरेका थिए । नेपाली सेनाको हेलिकप्टर मार्फत घिमिरे खाँडोदवी मन्दिर आएका घिमिरेले खाँडोदवी मन्दिरको दर्शन गर्दै सभामुख घिमिरेले विकास कोषको उद्घाटन पनि गरे । कार्यक्रमको उद्घाटन गर्दै सभामुख घिमिरेले खाँडादेवी मन्दिरको इतिहासलाई प्रचारप्रसार गर्न सके यस ठाउँमा धार्मिक पर्यटकीय तिर्थस्थलको रुपमा विकास गर्न सकिने बताए । खाँडादेवी मन्दिरको विकास र समृद्धिको लागि स्थानीय सरकार, प्रदेश सरकार र सङ्घीय सरकारले समेत पहल गर्ने सभामुख घिमिरेले बताए ।

खाँडादेवी विकास कोषको १२ औं वार्षिक साधारण सभा तथा तेस्रो अधिवेशनको उद्घाटन समारोहमा सङ्घीय सरकारका उर्जा, जलस्रोत तथा सिँचाइ राज्यमन्त्री पूर्णबहादुर तामाङ (कान्छाराम) बामगती प्रदेश सभा सदस्य युवराज चौलागाई, आनन्दकुमार श्रेष्ठ, बागमती प्रदेशका पूर्व अर्थमन्त्री कैलाशप्रसाद ढुङ्गेल, जिल्ला समन्वय समिति रामेछाप नेपाली कांग्रेसका प्रमुख चिना खड्का, खाँडादेवी गाउँपालिका अध्यक्ष ज्ञानकुमार श्रेष्ठ लगायतको पनि उपस्थिती समेत रहेको थियो ।

रामेछापको खाँडादेवी गाउँपालिकास्थित राकाथुम फेदीमा रहेको विश्वामित्र गुफासँगैको सुनकोसी नदीमा दुर्गा भगवतीले सुन्डमुसुन्ड राक्षसको बध गरी सोही ठाउँमा खुँडा पखाली खुँडा स्थापना गरेको हुनाले सोही ठाउँलाई खाँडादेवी भनिएको धर्मशास्त्रीहरुको भनाइ छ । देवीले राक्षसहरुको बध गरी सोही ठाउँमा खुँडा पखालेको र खाँडादेवीमा पुगेर खुँडा गाडी दोलखाको कालिन्चोकमा गएर दुर्गा भगवती अन्तरध्यान भएको कुरा धर्मशास्त्रमा उल्लेख रहेको धर्मशास्त्रीहरु बताउँछन् । विश्वामित्र गुफासँगैको सुनकोसी नदी किनारमा दुर्गा भगवतीले सुन्डमुसुन्ड राक्षसको बध गरेको हुनाले यस ठाउँलाई दुर्गा आर्यघाटको नाम समेतले चिनिन्छ ।

नवनिर्वाचित अध्यक्ष तामाङले खाँडादेवी मन्दिरलाई अझै बढी प्रचारप्रसार गरि अन्तर्राष्ट्रिय रुपमा मन्दिरलाई चिनाउने आफ्नो उद्देश्य रहेको र आफुमा कुनै प्रकारको लोभ लालच नभई आफ्नो कार्यकाल भरी मन्दिरको आर्थिक परदर्शिता र अनिमिततालाई निरुत्साहित गर्दै प्रभावकारी काम गर्ने प्रतिबद्दता समेत व्यक्त गरे ।

खाँडादेवी मन्दिर नेपालकै प्रसिद्ध शक्तिपीठ मध्ये एक हो ।

– राजन खत्री