– मौनता थापा
१,
निभेको सम्बन्ध जगाउनु परेको छ
भ्रमको  तुवाँलो भगाउनु परेको छ
तँ बाँचेर के गर्छेस ? भन्छौ  तिमी
बैगुनीलाई गुन लगाउनु परेको छ ।

२,
बढ्दै नदी उर्लिदै  किनारामा  छाल  हुन्छ
सत्य कर्म  गर्दा सधै त्यसै किन गाल  हुन्छ
पाइला पाइला सजग अघि बढ्नु पर्छ हामी ,
साँचो माया अमर बन्छ ,झुठो बेहाल हुन्छ ।

३,
फुल्नु नै छ यदि भने बेली बनेर फुल
दिनु छ सुवास भने चमेली बनेर फुल
पारिजात बनि  किन  झर्नुछ  आखिर,
पूर्ण चन्द्रमा जस्तै उजेली बनेर फुल ।

४
निकै  नहुने घाउको खाटो दुखेर रुँदैछु म
जिन्दगीको भद्रगोल पाटो दुखेर रुँदैछु  म
बिना कारण किन रुन्छेस भन्छौ नी तिमी !
रित्तिदै गएको देशको माटो दुखेर रुँदैछु म ।

५,
स्वर्ग  हो  कि  धर्ती  भन्नै  गाह्रो  भयो
अङ्क  हो कि  अक्षर गन्नै गाह्रो भयो
ठिकै थियो उन्नाई बीस  मात्र भएपनि ,
आकाश हो कि जमिन खन्नै गाह्रो भयो ।