– जिज्ञासु पौडेल तिलक

१,
साथ या संगत भन्ने कुरा अलि फरक हो
मत र अभिमत भन्ने कुरा  अलि फरक हो
इमान इज्जत बिरासत हो धानीराख्नु पर्ने
यो धन दौलत भन्ने कुरा अलि फरक हो ।

२,
आफ्ना रहर आफुखुशी साँच्न सक्नेछौ
हाँस्न सक्नेछौ उफ्रीउफ्री नाच्न सक्नेछौ
मेरा यादले तिमिलाई छटपटिनु पर्दोरैछ
मलाई बिर्स त,ढुक्कसँग बाँच्न सक्नेछौ

३,
कसरी भनौँ खै के ठान्छ! समयले मलाई
केही न केही दिएरै जान्छ समयले मलाई
अगाडिबाट मुस्कुराउन  सिकाए झैँ गर्छ
पछाडिबाट  छुरा हान्छ  समयले मलाई

४,
ढुङ्गा जस्तै कठोर मन हुन्छ सोच्दै नसोच्नु
झगडा नै हुन्छ, भनाभन हुन्छ सोच्दै नसोच्नु
नबोलौँला, टाढै बसौँला यी फरक कुरा हुन
मबाट सम्बन्धको पतन हुन्छ सोच्दै नसोच्नु।

५
काम छोड्नु हुन्न, कुरो छोड्नु हुन्न
हर प्रयासको चुरो चुरो छोड्नु हुन्न
प्राप्तीको बाटो सहज हुनेछ पक्कै
शुरु गरेको यात्रा अधुरो छोड्नु हुन्न

***