✍️ जीवन भण्डारी

मुक्तक-  एक

बसिरहनेलाई के को हतार, बसिरहेको बेला
मस्त निदाइरहेकोछ यार, बसिरहेको बेला
मलाई रोजगार देला भनेर कसरी चिताउँ मैले
सरकार स्वयम् बेरोजगार, बसिरहेको बेला।

मुक्तक – दुई

जिन्दगी बेचेर आय के हुन्छ परदेशीलाई ?
जिउँदै मर्नु सिवाय के हुन्छ परदेशीलाई ?
बा आमा र देश छोडेर हिड्नुपर्यो सरकार
त्यो भन्दा ठूलो सजाय के हुन्छ परदेशीलाई ?

मुक्तक – तीन

लुट्ने , खाने जाली मान्छे बसेको रैछ
देशै खल्तीमा हाली मान्छे बसेको रैछ
देश बिकाश किन हुन्न भनेर हेर्न जाँदा
खाली कुर्सीमा खाली मान्छे बसेको रैछ

मुक्तक – चार

आफ्नै समस्या सुल्झाउन राजनीति गरेका छन्
नाम सँगै दाम कमाउन राजनीति गरेका छन्
देश चलाउन राजनीति गरेकै छैनन् उनीहरू
उनीहरू त घर चलाउन राजनीति गरेका छन्

मुक्तक – पाँच

नउठ्ने आसामीको साँऊ देखे जस्तै
पहाडबाट समथर ठाँऊ देखे जस्तै
मैले तिम्लाई नदेख्दा यति धेरै देख्छु
परदेशीले सपनामा गाँऊ देखे जस्तै