– जीवनपानी

गजल १,
बाटो हुँ ! टेकाउँथें , टेकेनन् ; मैले के गरूँ ?
चिनिन्थें , अनुहारै  हेरेनन् ; मैले  के  गरूँ ?

किनकि यो आत्माले नबोली ; सबै बोल्दछ !
सुनेर  कृष्णलाई , लेखेनन् ;  मैले  के  गरूँ ?

“ध्वनि हुँ , प्रतिध्वनि म दिन्छु ; आऊ खेलाऊ!”
भनेथें , किन्तु  कोही  खेलेनन् ; मैले के गरूँ ?

“लामो छ , पर्खाइको गोरेटो ;  ढिलो नगर !”
ऐनाले भुलाएछ , भेटेनन् ;  मैले  के  गरूँ ?

‘पानी’को कहानी हुँ , म बिक्छु;नाफैनाफामा !
बेचे पो  म  बिक्दथें , बेचेनन् ;  मैले  के गरूँ ?

गजल २,
कण-कणमा आकर्षण, चुम्बक जिन्दगी ;
क्षण तत्क्षण  विलक्षण, रोचक  जिन्दगी !

शेष  विशेष  विशेषण, जोश  जागरण ;.
गुण सद्गुण परिपूर्ण, सार्थक जिन्दगी !

वर्ण सुवर्ण आभूषण, रूप अलौकिक;
आचारण  उदाहरण, फरक  जिन्दगी !

राग  पराग परागण, बीज अङ्करण ;
हराभरा वातावरण, कृषक जिन्दगी !

समीकरण   साधारण,  जाँच  परीक्षण ;
व्याकरण हस्तान्तरण, पुस्तक जिन्दगी !

***