✍️ ईश्वर थापा

गजल – एक

अब त जीवनभर हाँसिन्न हो ?
हाँसो भनेको त केही दिन न हो

बाँच्नै पर्ने जरुरी भयो भने,
बाँचेर पनि बाँच्न सकिन्न हो ?

के हो रे ? मलाई रुन दिँदैनौ !
तिमीलाई हँसाउन पाइन्न हो ?

मलाई पनि अजनबी बनायौ ?
भनिदेउन क-कस्लाई चिन्न हो ?

जसलाई हेर्न मैले आँखा बेचेँ
अब त उसलाई नि देखिन्न हो ?

गजल – दुई

म पनि पुग्छु भनेर पुगेको छैन
बाटोले बाटो खोजेर पुगेको छैन

तिमी पनि मर्न चाहन्छ्यौ अब ?
तिमीलाई पनि बाँचेर पुगेको छैन ?

म पुग्दा फर्केर हेर्नेहरु छन् जहाँ
त्यहाँ कहिल्यै फर्केर पुगेको छैन

मलाई माथि पुर्याउन खोज्दैछौ
अझै, तल झारेर पुगेको छैन ?

जान्न भनेर मात्रै तिमीसम्म पुग्छ
यो मन जान्छु भनेर पुगेको छैन

त्यहाँसम्म घिस्रेर पुगिसक्यो दुनिँया
जहाँसम्म म दौडेर पुगेको छैन